Бухадиев Муса Айдаевич пох1ма долуш поэт ву. target="xml" content="namespace prefix = o ns = \"urn:schemas-microsoft-com:office:office\" /"/>?> Иза вина 1952-чу шеран 29-чу октябрехь Казахстанан Караганда-г1алахь. 1959-1969-чуй шерашкахь Лакха-Неврерчу юккъерачу школехь дийшира цо. Школа кхиамца чекхъяьккхинчул т1аьхьа, иза Кубански юьртбахаман институте деша вахара. Цо 1974-чу шарахь цу институтан стом-хасстом а, кемсаш а лелоран факультет чекхъяьккхира. Мусайн стихаш арахоьцу вайн республикан "Даймохк", "Теркйист", "Теркан бакъдерг" газеташна а, "Орга", "Стела1ад" журналашна а т1ехь. Мусан байташ шайн цхьа башха кеп йолуш ю.. Шуна уьш хаза хетар ю аьлла дегайовхо-м ю сан, хьоме бераш..) Нана Жовх1ар деза хьо массарел, Делан совг1ат мерза сел, Хаац, вовшийн дела вай мел... Цкъа а лур дац хьо езар шел! Токхо, беркат, совг1ат, бахам, Марзо, безам, ирсан барам, Къинхетамийн сирла йовхо, Комаьршаллин оьзда бакъо.. Хьайниг санна, бац къинхетам, Яц комаьршалла, бац безам, Хьайниг санна, нана, тешам Хуьлуш бац, мел хиларх лерам.. Жовх1ар деза хьо массарел, Делан совг1ат мерза сел, Хаац, вовшийн дела вай мел... Лур дац цкъа хьо езар шел! * * * Зули яц и, набъеш 1ийриг? Маша, хьаса, тай я т1ийриг, Чухий, мушший, бухка, тел, Муьлхачех бо бабас уьйриг, Стенна оьшу муьлха, мел? Синтар, диттий, хенний, гуьйриг, Мангал, шадий, баьхьий, бел, - Хаьий шуна цаьрца дийриг? Муьлха муьлхачо йо г1ел? Х1уьнан йоьжна т1ера чкъуьйриг, Т1ум лур юй те цуьнан шел? Муьлха ву шух ч1ог1а луьйриг? Бераш, жимма собардел.. Зули яц и, набъеш 1ийриг? Х1ара-м, гарехь, елла г1ел, Мегаш ма дац сов т1ех дийриг, Бераш, к1езиг набарш ел!) * * * Со-м, Нана, цецъяьллий.. Дашо ахча, хьайбан лаг, Ши дум кхиъна эмкаллий, Кхийра кхаба, попан чийлак, Таьлсаш чохь саьмгаллий, Дато доьхка, к1айн б1ег1аг, Хен кхуора шапталлий, Аьчкан черма, ножан шелаг, Ц1еста к1удал, 1аж-баллий, Ба1ар, басар, ширдолаг, Г1ад, цаний, мангаллий, Ч1иж, можа карчолаг, Яй чуьйна, буька зайлий, Т1ома лела бирдолаг. - Нана, дада самваьллий? - Хьалаг1аттахьа, Баколаг, Иза-м хьуна г1ан дайний, Дала дойла дика мел дерг! - Со-м, нана, цецъяьллий.. - Цец ма яла, сан хазниг, Цуо-м хьуна ирс деллий..) * * * Сан к1орни.. Тукар, т1арий, тайдечиг, Топ, тапча, тур, шаьлтий, Ков, аьлха, т1улг, г1айракх, Сахьт, мух1ар, гуьлмаьндий, Муьлха деза, ахьа ала, Сан к1орни, самадала. Туьха, сискал, т1уо-берам, Х1оъ-молха, дуо, вертий, Вота-пондар, синкъерам - Го, ц1ено, ков-керттий. Муьлха деза, ахьа ала, Сан к1орни, самадала. Нуьйра, дуьрста, дин, шеддий, Тай-маха, 1ад, урчакх, Малх, стигал, бутт, седий, Ахча, бохча, шок, байракх - Муьлха деза, ахьа ала, Нанин дог, самадала. Туьйра г1ерта чекхдала, Самаяьлла ю г1ала, Х1ай, к1орни, самадала, Буй хьуна сан бала? Дала хьуна ирс лойла, Хьо-м Делан малик ду! Вон долчух лардойла, Хьо-м ненан дог ма ду. Х1ай, к1орни, самадала, Дела кхаба ахь хьайн нана!) * * *
|